Hei tēnei Matariki, kia toitū te anga ki te pae tawhiti

Ko Matariki tō tātou tauhou Māori, he wā motuhake tēnei i te maramataka Māori hei whakanui, hei arotake, hei huritao hoki. He wā kia whai whakaaro, rapu whāinga hou, te whai māramatanga mai i tērā tau hei tūāpapa mō ngā mahi hou.

English version

I a tātou e titiro ana ki tō tātou āhua noho – otirā te āhua noho me te pūtea – he aha tērā e whakaawe ana i a tātou ki te anga ki te pae tawhiti, me te whai i ngā kōwhiringa toitū ake?

Ko te mātauranga Māori te mātāmua 

Ko Matariki te wā e mātāmua ai te mātauranga Māori i te pae ā-motu, ki tētahi kaupae i uaua ai te kakenga i ētahi atu wā. Ka kawea tātou ki Te Ao Māori e Matariki i ngā huarahi mīharo – mā te kōkōrangi, mātai hauropi, whakaaro me te whakamahere rautaki.

Ka aumihitia te hunga kua riro, me te mārama anō koinei te wā ka whetūrangitia ō rātou wairua, hei tohu maharatanga ki a tātou i a rātou e tīrama mai ana i te pō, kei konei tonu rātou.

He maha ngā tohunga rongonui e tuku here kore ana i ō rātou mōhiotanga i tēnei wā, i runga i te tūmanako ka tipu haere, ka raungāwari hoki tātou i tēnei wā. Kia mōhio ake tātou ki ngā iho matua o ngā pānga ki a Papatūānuku, ā, kia raungāwari ake tō tātou tiaki i taua mātauranga.

Kia anga ki te mano tau, ko te toitūtanga te pūtake o te rautaki Māori: te noho tapatahi ki a Papatūānuku.

He taonga a Matariki, te whetū arataki

He wā anō ko te āhua nei e kōkiritia ana tātou ki tētahi anamata hangarau i poua ki te mata rorohiko me ōna ata mariko. E taunga ana ngā kōhungahunga ki te ao matihiko, te mareti i ngā papa karaehe, e tāria ana he whakautu. Ina taiohi rātou, ko te āhua nei ka ruarua ake ngā momo tipu, kīrehe hoki i tō tātou ao, e whakapaua nahahatia ana e tātou.

Ka wātea whānuitia tonu te waimāori? Ka kite tonu tātou i ngā kaupeka tau pēnei i a tātou e kite ana ināianei? Māna, e hangaia ana he ao takurua-kore e te mahana haeretanga o te ao?

Ehara te hanganga-tangata i te mokopakihi hauropi whaimana!

Nō reira, he taonga a Matariki, he whetū arataki – he tānga manawa mai i te ao hurihuri o te tangata. He wā a Matariki e noho whakaiti anō ai tātou, e noho teina anō ai tātou, ki ngā hapori ora o te ao.

Te Ara Ahunga Ora

Ko te tira e taituara ana i a Sorted e whānau hou ana hei rōpū whakahaere i tēnei Matariki anō hoki!  Nā te arotake i tō mātou moemoeā me te whāinga matua, kātahi anō ka tutuki i a mātou te mahi whai tohu hou.

Hei te wiki e tū mai nei, ka whakarewaina tō mātou ingoa Māori hou, tohu hou hoki. Mai i te 1 o Hūrae ka mōhiotia ai mātou ko 'Te Ara Ahunga Ora Retirement Commission', he ingoa e whakaatu ana i te hauora me te oranga whānui, otirā ko te oranga ahumoni tētahi wāhanga.

Ahu whakamua, ka mārama ake te whakaatu o ā mātou mahi ki ngā āheinga ka hangaia i raro i Te Tiriti o Waitangi – tae atu ki te mahi motuhenga i roto i Te Ao Māori. Ka taea pea te kī ake, e ngana tonu ana mātou ki "Te whai hua - kia ora"!

Dr Kathie Irwin (Ngāti Porou, Rakaipaaka, Ngāti Kahungunu) is Kaihautū at Te Ara Ahunga Ora, where she upskills the Sorted team in te ao Māori and helps us grab the best of both worlds. She helps drive improvements in retirement outcomes for Māori, and imbues our work with te ao Māori so that we champion the Treaty of Waitangi, support diversity and inclusion, and implement Māori strategies to create positive change.