Hākari. He tohu o te aroha.

I te puāwaitanga o te Pohutukawa, he tohu kua tau mai te raumati me ōna hua. Ka rongo i te mahana ki te kiri, ka rongo i te mahana ki te ngākau. Ka rongo hoki i te karanga o te kāenga kia hokihoki atu te whānau ki te ūkaipō, whakakōtahi ai. I taku tamarikitanga, ko te kāenga a nanny rāua ko pāpā te ūkaipō i karanga mai ki a au.  

(English version) 

Ko aku maumahara ki te wā o te raumati, o te Kirihimete, he noho tahi, he tākaro, he kauhoe, he toha taonga. Kāti, he hora i te tēpū i ngā kai reka nā ōku pāpā i kohi, nā nanny me ōku whaea katoa i whakarite, i runga i te aroha. E pono ana ko te aroha te kīnaki i whakareka ai te kai. Koia hei hākari mō mātou ko te whānau. He hākari kua tākaia ki te aroha.   

Arā noa tētahi pūtake o te hākari. He whakakōtahi i te tangata, he whakanoa i te tapu, he whakamihi i te kaupapa o te wā. Heoi, he wā mā tēnā, mā tēnā tōna rourou e hora ana, hei oranga mō te iwi.   

Kua puritia ngā tikanga o te hākari ki ēnei rā. Ahakoa kua mahue atu a nanny, a pāpā, ka huitahi tonu te whānau i ia tau. Ko ngā pakeke ka whakarite i te hākari, ko ngā mokopuna ka pāinaina. Ko au me taku rourou, ko aku whanaunga me a rātou rourou, ka hora ki te tēpu. He tohu, e ora tonu ana ko te aroha.  

Kāti rā, kia hoki ngā mahara ki te wā a kui mā, a koro mā. I mahi ngātahi rātou ki te whāngai i ngā tini mokopuna o te pā, kia ora pai mātou katoa. I kaha penapena pūtea rātou,i ngaki māra, i kohi kai, i wāwahi i te māhi kia pai ai tā rātou manaaki i te whānau. Tae atu ai ki te rā o te hākari, kore rawa mātou i rongo i ngā taumahatanga. Ka rongo noa i te reka o te kai! Nā reira, ko te reka o te hākari, he tohu o te aroha! 

Ko Erin Thompson (kei waenganui e menemene ana) te Kaihautū ki Te Ara Ahunga Ora Retirement Commission, nāna te whānau o Sorted e āwhina ki te whakatū he pātū e iri ai ko ngā kaupapa ahumoni nō te ao Māori, e ai ki te tirohanga Māori.