Ekea te tiritiri o te moana hei te tau tītoki

He wā ki te kōkiri i ētahi mahi, he wā hoki ki te whakarerekē. He wā ki te whakanui i ngā hauhakenga, heoi anō he wā hoki ki te pokapoka i te whenua mō ngā kākano hou o te tau e tū mai nei.

English version

Matariki, koirā hoki te ingoa o tētahi kāhui whetū e mōhiotia ana ko ‘Pleiades’. He kāhui whetū tērā nō ētahi atu kāhui whetū e tino pātata ana ki tēnei ao, he kāhui hoki tēnei e kitea ngāwaritia ana – ka tau te mauri i te mōhio ake e mātakitaki ana ērā whetū i a tātou. Kia mahuta ake ai rātou i ia takurua, e tohu ana rātou i ētahi tīmatanga hou.

Nō reira, i a tātou ka titiro whakamua ki te tau hou i tēnei wā o Matariki, he tau, pēhea nei, te tau e tū mai nei?

He wā tēnei hei arotake i ā tātou pūtea, he wā hoki hei whakatakoto i ētahi rautaki kia pai ake ai te wairua ā tērā tau, tēnā i te momo e rangona nei. Koinei te wā e whakaae ai tātou ki ētahi o ngā mea tē taea te whakatutuki, ki te whakapaipai hoki i ngā kāpata ā-pūtea.
Ko ngā moni tārewa, hei tauira. Tokomaha tātou e noho nama tonu ana, ā, ko te reo tēnei o aku wheako i ahau ka kī ake, i ētahi wā he taumaha te waha i ērā momo pīkautanga. Ka tata ake rānei tātou ki Te Korokoro-o-Te-Parata, ka māmā iho ai rānei ērā pīkautanga i te rewanga anō o Matariki, ā tērā tau? Ē, mā te aha i tērā hei momo iti kahurangi mā te tangata.

Mehemea kāore anō koe kia whakamātau atu, e taea ana e tā mātou tātaitai moni tārewa te kimi i ētahi huarahi tere e puta ai koe i aua pōrarurarutanga. Sorted ētahi rauemi pai hei āwhina i a tātou ki te whakarite i tētahi mahere ahumoni pai, arā ko ngā puka tātaki, ko te rangitaki, me ētahi taputapu tuihono pērā i te whakamahere nama (debt calculator).

I ngā wā o Matariki, whakanuia ai e tātou ngā mea kei a tātou, me ngā kaha hoki me whakapau e tātou. He rawe tēnei wā ki te whakarite whāinga (goal planner), ki te whakatakoto rautaki mō ā tātou pūtea (budgeting tool), me te mātua mōhio e rere ana aua pūtea ki ngā wāhi e tūmanakotia ana (money tracking). Pēnei i te āta whakariterite i te māra kia matomato ai te tupu o ētahi hua e whāngaia ai te whānau katoa.

Nō reira, kia harikoa i roto i ngā whakanuitanga, me ngā tīmatanga hou. Waiho iho mā tēnei whakataukī Māori e whakakōpani ake i ēnei kōrero āku:

Mā te whakaatu, ka mōhio
Mā te mōhio, ka mārama
Mā te mārama, ka ora ai tātou

Mā ngā kanohi hōmiromiro o Matariki tātou katoa e manaaki i roto i te tau e kainamu mai nei, i a tātou ka pakanga kia pai ake ai tā tātou noho – mō tātou ake, mō ērā hoki e karapoti ana i a tātou.